ՆՈՅՆԱՑՈՒՄ

Ի՛նչ խօսք՝ սիրուն է Երեւանն անբաւ,
Ի՛նչ խօսք՝ սրտիս մէջ յաւերժ կը մնայ.
Այս ողջ աշխարհում ոչ մի տեղ բնաւ
Նրա հմայքն ու համը չի ունենայ։

Ի՜նչ խօսք՝ ահաւոր գեղեցիկ ես դու,
Ինչ խօսք՝ անխնայ՝ առինքնող, ջահէլ.
Այս ողջ աշխարհում, գիտցիր աներդում,
Ոչ ոք չի գերի ինձ քեզնից աւել…։

. . . . . . . . . . . . . . . . . . . .

Այն օրւանից երբ ապրում ես այնտեղ,
Իմ սիրտն այլեւս կտրել է արիւն.
Դու Երեւանով աւելի ես շքեղ,
Երեւանն քեզնով աւե՜լ է սիրուն…

25.10.97